ಯಮಕನಮರಡಿ: ಆಷಾಢ ಏಕಾದಶಿ ಹತ್ತಿರವಾಗುತ್ತಿದ್ದಂತೆ ಗೋವಾ ಮತ್ತು ಕರ್ನಾಟಕದ ಸಾವಿರಾರು ಭಕ್ತರು ಪಂಢರಪುರದ ವಿಠ್ಠಲ ದೇವರ ದರ್ಶನಕ್ಕಾಗಿ ಪಾದಯಾತ್ರೆ ಆರಂಭಿಸಿದ್ದಾರೆ. ಭಕ್ತಿಯ ಜ್ವಾಲೆಯಲ್ಲಿ ಸಾಗುತ್ತಿರುವ ಈ ಭಕ್ತರ ದಂಡು ಸುರಿಯುತ್ತಿರುವ ಮಳೆಯನ್ನೂ ಲೆಕ್ಕಿಸದೆ ಭಜನೆ, ನಾಮಸ್ಮರಣೆಯೊಂದಿಗೆ ಪಂಢರಪುರದತ್ತ ಹೆಜ್ಜೆ ಹಾಕುತ್ತಿದೆ.
ಯಮಕನಮರಡಿ ಎನ್‌ಎಚ್-4 ಮುಖ್ಯ ರಸ್ತೆ ಹಾಗೂ ಹುಕ್ಕೇರಿ ತಾಲೂಕಿನ ದಡ್ಡಿ ಗ್ರಾಮದಿಂದ ಹತ್ತರಗಿ ಗ್ರಾಮವರೆಗಿನ ರಸ್ತೆಗಳ ಮೇಲೆ ನೂರಾರು ಭಕ್ತರು ಪ್ಲಾಸ್ಟಿಕ್ ಶೀಟ್, ಜಾಕೆಟ್ ಧರಿಸಿ ಮಳೆಯಲ್ಲಿಯೇ ನಡೆಯುತ್ತಿರುವ ದೃಶ್ಯ ಸಾರ್ವಜನಿಕರ ಗಮನ ಸೆಳೆಯುತ್ತಿದೆ. ತಲೆಯ ಮೇಲೆ ತುಳಸಿ ಬಿಂಡಿಗೆ, ಕೈಯಲ್ಲಿ ಭಜನೆ ಸಾಮಗ್ರಿಗಳೊಂದಿಗೆ ಭಕ್ತರು ಭಕ್ತಿ ಪರವಶರಾಗಿದ್ದಾರೆ.
ಪ್ರತಿ ವರ್ಷ ಆಷಾಢ ಮತ್ತು ಕಾರ್ತಿಕ ಏಕಾದಶಿಯ ಸಂದರ್ಭದಲ್ಲಿ ಪಾದಯಾತ್ರೆ ನಡೆಸುವುದು ಈ ಭಾಗದ ಭಕ್ತರಲ್ಲಿ ಸಂಪ್ರದಾಯವಾಗಿದೆ. ಸುಮಾರು 400ರಿಂದ 500 ಕಿಲೋಮೀಟರ್ ದೂರದ ಪಂಢರಪುರದ ಕಡೆ ಪಾದಯಾತ್ರೆಯಲ್ಲಿ ಸಾಗುವ ಈ ಭಕ್ತರ ಜಾತ್ರೆಯಲ್ಲಿ ಮಹಿಳೆಯರು, ವೃದ್ಧರು, ಯುವಕರು, ಬಡವರು, ಶ್ರೀಮಂತರೆಂಬ ಬೇಧವಿಲ್ಲದೆ ಎಲ್ಲರೂ ಭಾಗವಹಿಸುತ್ತಿದ್ದಾರೆ.
ಪ್ರತಿ ದಿನ ಭಕ್ತರು ಸುಮಾರು 40-50 ಕಿ.ಮೀ. ದೂರ ಪಾದಯಾತ್ರೆ ನಡೆಸಿ ದಾರಿಯ ಮಧ್ಯದ ದೇವಸ್ಥಾನಗಳು, ಧರ್ಮಶಾಲೆಗಳಲ್ಲಿ ವಿಶ್ರಾಂತಿ ಪಡೆಯುತ್ತಾರೆ. ಸ್ಥಳೀಯ ಭಕ್ತರು ಅವರನ್ನು ಆತಿಥ್ಯದಿಂದ ಸ್ವಾಗತಿಸಿ ಊಟ-ಉಪಹಾರದ ವ್ಯವಸ್ಥೆ ಮಾಡುತ್ತಿದ್ದಾರೆ.
ಪಂಢರಪುರ ತಲುಪಿದ ಬಳಿಕ ಭಕ್ತರು ಚಂದ್ರಭಾಗಾ ನದಿಯಲ್ಲಿ ಪುಣ್ಯಸ್ನಾನ ಮಾಡಿ ವಿಠ್ಠಲ-ರುಕ್ಮಿಣಿ ದರ್ಶನ ಪಡೆಯುತ್ತಾರೆ. ಈ ಯಾತ್ರೆಯು ಕೇವಲ ಶ್ರದ್ಧೆಯ ಚಟುವಟಿಕೆ ಮಾತ್ರವಲ್ಲ, ಅದು ಭಕ್ತರ ಭಾವನೆ ಮತ್ತು ಆಧ್ಯಾತ್ಮಿಕ ಶುದ್ಧತೆಯ ಪ್ರತಿೂೕಪವಾಗಿದೆ.
“ವಿಠ್ಠಲ ದೇವರ ಸಾನಿಧ್ಯ ನಮ್ಮ ಜೀವನಕ್ಕೆ ಶಕ್ತಿ ನೀಡುತ್ತದೆ. ಪಾದಯಾತ್ರೆಯಲ್ಲಿ ಯಾವುದೇ ಅಡೆತಡೆಗಳಿಲ್ಲ. ಇದು ಭಕ್ತಿಗೆ ಹೊಸ ಚೈತನ್ಯ ನೀಡುತ್ತದೆ,” ಎಂದು ಯಾತ್ರಿಕ ಪುಂಡಲಿಕ್ ಪಾಟೀಲ ಹೇಳಿದರು.
ಮಳೆಗೆ ತತ್ತರಿಸದೆ ನಡೆಯುತ್ತಿರುವ ಈ ಪಾದಯಾತ್ರೆ ಭಕ್ತರ ಶ್ರದ್ಧೆ ಮತ್ತು ಸಮರ್ಪಣೆಯ ಅತ್ಯುತ್ತಮ ಉದಾಹರಣೆ ಎಂಬುದು ಸ್ಪಷ್ಟವಾಗುತ್ತಿದೆ.
ವರದಿ: ಕಲ್ಲಪ್ಪ ಪಾಮನಾಯಿಕ್
ನಮ್ಮೂರ ಧ್ವನಿ ನ್ಯೂಸ್
ಸುದ್ದಿ ಮತ್ತು ಜಾಹೀರಾತಿಗಾಗಿ ಸಂಪರ್ಕಿಸಿ
+91 9164577143
