ಪತ್ರಕರ್ತ ಎಂಬ ಪದವನ್ನು ಕೇಳಿದ ಕ್ಷಣಕ್ಕೆ ನಮ್ಮೆದುರಿಗೆ ಸುದ್ದಿಯ ಲೋಕ, ಟಿವಿ ವಾಹಿನಿಗಳು, ದಿನಪತ್ರಿಕೆಗಳು, ಆನ್‌ಲೈನ್ ಮಾಧ್ಯಮಗಳು ಮತ್ತು ತೀಕ್ಷ್ಣ ಲೇಖನಗಳು ಮೆದುಳಲ್ಲಿ ಮೂಡುತ್ತವೆ. ಆದರೆ ಈ ಶಬ್ದದ ಹಿಂದೆ ದುಡಿತ, ಧೈರ್ಯ, ನಿಷ್ಠೆ, ಮತ್ತು ಅನೇಕ ಅಡಚಣೆಗಳನ್ನು ಮೀರಿದ ತ್ಯಾಗದ ಕಥೆ ಇದೆ.
ಒಂದು ನಿಖರ ಸುದ್ದಿಯನ್ನು ಜನರ ಮುಂದೆ ತರಬೇಕೆಂದರೆ ಪತ್ರಕರ್ತನೊಬ್ಬ ಮಳೆಯೋ ಚಳಿಯೋ ಬಿಸಿಲೋ ಎಂದೆನಿಸದೆ ಕೆಲಸದಲ್ಲಿ ತೊಡಗಿಸಿಕೊಳ್ಳಬೇಕು. ಅವನ ಗುರಿಯೇನಂದರೆ ಸತ್ಯವನ್ನು ಕಂಡುಹಿಡಿದು, ಅದನ್ನು ಜನರಿಗೆ ವಿಶ್ವಾಸಾರ್ಹವಾಗಿ ತಲುಪಿಸುವುದು. ಇದು ತಾನು ನಿಭಾಯಿಸುವ ಧರ್ಮ, ಇದು ಅವನ ಬರಹದ ಅಸ್ತ್ರ.
ಪತ್ರಕರ್ತನ ದೈನಂದಿನ ಜೀವನ ಸಾಹಸ ಮತ್ತು ಅಪಾಯಗಳ ಮಿಶ್ರಣವಾಗಿದೆ. ಯಾವುದೋ ಕ್ಷಣದಲ್ಲಿ ಹಠಾತ್ ಸಂಭವಿಸುವ ಘಟನೆಗೆ ಓಡಿ ಹೋಗಬೇಕಾದರೆ ಅಥವಾ ದಪ್ಪಬಟ್ಟೆಯಿಲ್ಲದ ಚಳಿಗಾಲದ ರಾತ್ರಿ ತೂರಿ ನಿಂತು ವರದಿ ಮಾಡಬೇಕಾದರೆ – ಅವನು ಹಿಂದೇಟು ಹಾಕುವುದಿಲ್ಲ. ಜನರಿಗೆ ಸತ್ಯವನ್ನು ತಲುಪಿಸುವುದೇ ಅವನ ಧ್ಯೇಯ.
ಇದರಲ್ಲಿ ಅಸಹ್ಯತೆಯ ಸಂಗತಿಯೆಂದರೆ – ಇತ್ತೀಚೆಗೆ ಕೆಲವರ ತಪ್ಪು ನಡೆಗಳಿಂದ ಎಲ್ಲಾ ಪತ್ರಕರ್ತರು ಚುಟುಕು ಟೀಕೆಗೆ ಗುರಿಯಾಗುತ್ತಿದ್ದಾರೆ. “ಅವನು ರಾಜಕೀಯದ ಕೈಯಲ್ಲಿರುವ ವ್ಯಕ್ತಿ”, “ಸತ್ಯ ತೋರಿಸುವುದಿಲ್ಲ”, ಎಂಬುದು ಎಲ್ಲಾ ಪತ್ರಕರ್ತರಿಗೂ ಅನ್ವಯಿಸದು. ನಿಷ್ಠಾವಂತ ಪತ್ರಕರ್ತರು ಇಂದಿಗೂ ಇರುತ್ತಾರೆ – ತಮ್ಮ ಜೀವವನ್ನು ಪಣಕ್ಕಿಟ್ಟು ಸಮಾಜಕ್ಕೆ ದೀಪವಾಗಿ ನಿಂತಿದ್ದಾರೆ.
ಪತ್ರಿಕೋದ್ಯಮದ ಇತಿಹಾಸದಲ್ಲಿ ಹೆಮ್ಮೆಪಡುವ ಕ್ಷಣವೊಂದೇಂದರೆ — ಕನ್ನಡದ ಮೊದಲ ಪತ್ರಿಕೆ ಮಂಗಳೂರು ಸಮಾಚಾರ ಇದು 1843ರ ಜುಲೈ 1 ರಂದು ಮಂಗಳೂರಿನಿಂದ ಪ್ರಕಟವಾಯಿತು. ಈ ಸ್ಮರಣಾರ್ಥವಾಗಿ ಜುಲೈ 1ರನ್ನೇ ‘ಪತ್ರಿಕಾ ದಿನ’ವಾಗಿ ಕರ್ನಾಟಕದಲ್ಲಿ ಆಚರಿಸಲಾಗುತ್ತದೆ.
ಇಂದು ಈ ವಿಶೇಷ ದಿನದ ನಿಮಿತ್ತವಾಗಿ ಎಲ್ಲ ಪತ್ರಕರ್ತರಿಗೆ, ಮಾಧ್ಯಮ ಉದ್ಯೋಗಿಗಳಿಗೆ ನಮ್ಮೂರ ಧ್ವನಿ ನ್ಯೂಸ್ ವತಿಯಿಂದ ಹೃತ್ಪೂರ್ವಕ ಶುಭಾಶಯಗಳು. ನಿಮ್ಮ ಧೈರ್ಯ, ಸಮರ್ಪಣೆ, ಮತ್ತು ಸಮಾಜಮುಖಿ ಸೇವೆಗೆ ವಂದನೆಗಳು!
✍️ ಚೇತನ ಡಿ.ಕೆ
ನಮ್ಮೂರ ಧ್ವನಿ ನ್ಯೂಸ್
